ՄՄեկ տարի առաջ Երևանի քաղաքապետարանի իրավասության տակ գտնվող «Սուրբ Աստվածամայր» բժշկական կենտրոնում տեղի ունեցած անհեթեթ միջադեպի արձագանքները մինչ օրս չեն լռում, և մարդիկ փորձում են գտնել իրական մեղավորներին, չնայած որպես քավության նոխազ` դատարանի առաջ են կանգնել այն բժիշկներն ու բուժաշխատողները, ովքեր անմիջական առնչություն են ունեցել միջադեպին: Հիշեցնենք, որ 2011 թ. մայիսի 3-ին «Սուրբ Աստվածամայր» բժշկական կենտրոնում բժիշկները 2004 թ. ծնված էջմիածինցի Գևորգ Մովսիսյանի փոխարեն վիրահատական սեղանին պառկեցրել էին 2008-ին նշյալ կենտրոնում թոքերի վիրահատության ենթարկված և այդ օրը հիվանդանոցում պլանային ստուգում անցնող 5-ամյա Նարեկ Դարբինյանին: Դժվար է ասել` դեպքը տեղի է ունեցել բուժանձնակազմի անփութության պատճառո՞վ, թե հիվանդանոցում տիրող ամենաթողության:

 Ավարտվեց «Շանթ» հեռուստատեսության «Հայսուպերսթար» նախագծի հինգերորդ եթերաշրջանը: Ճիշտ է` հինգերորդ հոբելյանականը նախորդի ցնցումը չառաջացրեց, սակայն հայ երաժշտարվեստի երկնակամարը շնորհալի երգիչներով համալրելու առումով պակաս բեղմնավոր չէր: Այս անգամ նախագծի հաղթող դարձավ 19-ամյա Սոնա ՌՈՒԲԵՆՅԱՆԸ` փոքրամարմին, բայց հզոր ձայնով երևանցի ուսանողուհին: Նա հաղթանակի համար դեռ նվերները կստանա` մեկ ձայներիզ` իր կատարումով, մեկ տեսահոլովակ և մեկ միլիոն դրամ: Բայց սկսնակ երգչուհու ամենամեծ պարգևը թերևս արվեստի ասպարեզում ճանապարհ հարթելու բացառիկ հնարավորությունն է: Այսօր Սոնան մեր զրուցակիցն է:

 Սփյուռքի նախարարությունը Հայաստանում ամենաերիտասարդն է: Ընդ որում երբ պետք էր բացվել, շատերը տարակուսում էին` այն կարդարացնի՞ իր գոյությունը: Գոյության և գործունեության մի քանի տարվա փորձն ունենալով` ի՞նչ ձեռքբերումներ է ունեցել նախարարությունը, որքանո՞վ է այդ կառույցի գոյությունը նպաստել հայրենիք-սփյուռք կապի ամրապնդմանն ու զորացմանը: Մեր հարցերին պատասխանում է ՀՀ սփյուռքի նախարար Հրանուշ ՀԱԿՈԲՅԱՆԸ:

 Իմ զրուցակիցն է օպերային երգչուհի, սոպրանո Իրինա ԶԱՔՅԱՆԸ: Իրինան ծնունդով Գյումրիից է, ավարտել է Երևանի Կոմիտասի անվան կոնսերվատորիայի վոկալի բաժինը (պրոֆեսոր Նելլի Փիրումովայի դասարանը): Ուսումն ավարտելուց հետո ընդգրկվեց տարբեր խմբերում` կատարելագործելով ձայնն ու կատարողական վարպետությունը: Դասական երաժշտության ընտրությունը այն ժամանակ, երբ երաժշտարվեստը ողողված էր փոփով, էստրադայով, իսկ դասականն «անհեռանկարային» ուղղություն էր համարվում, կարելի էր խիզախում համարել: Իրինային ընտրության հարցում թերևս օգնեց հոգևոր արժեքների փնտրտուքը: Իրինայի ամենամեծ փորձաշրջանը կոմպոզիտոր Երվանդ Երկանյանի «Տաղարան» համույթն էր, որը երգչուհու համար ճանապարհ հարթեց դեպի մեծ բեմ: Այնուհետև Լորիս Ճգնավորյանը նրան հրավիրեց իր ղեկավարած Հայաստանի ֆիլհարմոնիկ նվագախումբ` որպես մեներգչուհու: Եվ 17 տարի է` Իրինան նվագախմբի մենակատարն է: Երգչուհին շատ է շրջագայել, ելույթներ ունեցել հանրահայտ բեմերում, բազմաթիվ հրավերներ ստացել աշխարհի տարբեր երկրներից` ԱՄՆ, Կանադա, Իտալիա, Իսպանիա, Ավստրիա, Հունաստան, Գերմանիա: Իր մեղմահունչ սոպրանոյով նա օտար հանդիսատեսին ևս գերել է` երգելով թե դասական, թե հայրենական կոմպոզիտորների ստեղծագործություններ: Աշխատել է Օհան Դուրյանի, Էդվարդ Թոփչյանի, Լորիս Ճգնավորյանի, Գևորգ Մուրադյանի, Հովհաննես Չեքիջյանի, Լյուք Բաղդասարյանի (Շվեյցարիա), Ջոն Նելսոնի (ԱՄՆ), Լեոն Բոթսթայնի (ԱՄՆ) և ուրիշների հետ:
 

Ժամանակակից գրողներից շատ քչերն են, որ այսօրվա անմշակույթ, «անգիրք» դարում պահանջված են ու սիրված, շարունակում են ստեղծագործել ու տպագրվել, արժանանալ մրցանակների ու բարձր գնահատականների: Պերճ ԶԵՅԹՈՒՆՑՅԱՆՆ այդ երջանիկներից է, թեև ինքն այնքան էլ բեղուն չի համարում իր գրիչը: Բայց չէ՞ որ գրչի բեղունությունը որոշվում է ոչ այնքան ստեղծագործությունների քանակով, որքան դրանց խորությամբ ու իմաստնությամբ, ժամանակի ոգին որսալու և ընթերցողին հասցնելու հմտությամբ:

Սերժ Սարգսյանի և Եվրոպական հանձնաժողովի նախագահ Ժոզե Մանուել Բարոզուի՝ Բրյուսելում այս շաբաթ տեղի ունեցած հանդիպման ժամանակ Հայաստանի նախագահը հայտարարել էր, որ գիտակցում է «ազատ, արդար և ժողովրդավարական ընտրությունների կարևորությունը՝ մեր երկրի հետագա զարգացման և բարգավաճման գործում»: Դատելով այս նկարից՝ Հայաստանի քաղաքացիներն այնքան էլ չեն հավատում, թե այդ կարևորությունը Հայաստանի իշխանությունների համար կարևոր է: Լուսանկարը` Թագուհի Ասլանյանի

 Եթե ձմեռը «սովորական մահկանացուներիս» թշնամին է, ապա գարնանամուտը` քաղաքային իշխանությունների: Ձմռան ավարտի ու ձնհալի հետ ջրի երես են դուրս գալիս քաղաքի բարեկարգման համար հոգ տարած շինարարական ընկերությունների անորակ, անբարեխիղճ աշխատանքի և իհարկե` պատկան մարմինների` գումարներ գրպանելու հետևանքները: Անհասկանալի է, թե քաղաքային իշխանություններն ի՞նչ մրցույթներ են անցկացնում շինընկերությունների միջև, որ վերջնարդյունքում ընտրում են վատագույններին: Այլապես ինչով բացատրել այն փաստը, որ գրեթե ամեն ձմեռվանից հետո Երևանի մայթերը հիմնովին վերանորոգման կարիք են ունենում: Ճիշտ է` իրենց թերացումները թաքցնելու համար շինընկերությունները և քաղաքապետարանի աշխատակիցներն ամբողջ մեղքը բարդում են ձյան վրա, բայց այդ դեպքում ձյունն ինչո՞ւ է ընտրողաբար շարքից հանում այս կամ այն մայթի սալիկները և ոչ թե բոլոր մայթերի վրա նույն դավադիր ազդեցությունն ունենում:

 Սիրված երգահան, երաժշտագետ Էդգար ԳՅԱՆՋՈՒՄՅԱՆԻ հետ հանդիպեցի Քրիստափոր Քուշնարյանի անվան արվեստի դպրոցում, որտեղ տնօրեն-երգահանն իր երաժշտական փորձն ու բարձր արվեստի ձգտումը փորձում է սերմանել նաև փոքրիկ երգիչ-երաժիշտների մեջ: Դպրոցի տնօրեն լինելը բավական ժամանակատար և մեծ եռանդ ու մտավոր կարողություն պահանջող աշխատանք է: Չնայած դրանք` Էդգար Գյանջումյանը շարունակում է ապրել ստեղծագործական կյանքով և շուտով պատրաստվում է իր արվեստի սիրահարներին նոր ստեղծագործություններով ներկայանալ: Բայց դա ամենը չէ: 2008 թ. հիմնելով արյան քաղցկեղով հիվանդ երեխաներին աջակցող «Օգնեմ» բարեգործական հիմնադրամը ստանձնել է դրա հոգաբարձուների խորհրդի նախագահի պարտականությունները:

 «Հայաստանի զրուցակից» թերթն այսուհետ որպես «Շանթ» հեռուստաընկերության Հայսուպերսթար նախագծի ինֆորմացիոն գործընկեր` կլուսաբանի նրա գործունեությունը, հետաքրքիր միջոցառումները, կանդրադառնա այնպիսի մանրամասների, որոնք հեռուստատեսությամբ հնարավոր չէ դիտել, կներկայացնի մասնակիցների հաղթանակներն ու պարտությունները, հանձնախմբի անդամների կարծիքներն ու մեկնաբանությունները՝ ելույթների և քվեարկությունների արդյունքների մասին:

 Երևանի «Հրազդան» մարզադաշտի հարևանությամբ առևտրային կենտրոն կառուցելու նախագիծը բողոքի մեծ ալիք բարձրացրեց հասարակության, ճարտարապետների, անգամ մեր ֆուտբոլիստների շրջանում: Դրա շնորհիվ հնարավոր եղավ (գուցեև ժամանակավոր) կառուցելու համար նախատեսած հողակտորի սեփականատեր ԱԺ պատգամավոր Աշոտ Աղաբաբյանի հետ համաձայնության գալով` դադարեցնել շինարարական աշխատանքները, որոնք մեկնարկել էին սեփականատիրոջ, Երևանի քաղաքապետարանի և մայրաքաղաքի գլխավոր ճարտարապետ Նարեկ Սարգսյանի` 2011 թ. օգոստոսին ձեռնարկած գործարքի արդյունքում: Դա կանաչ լույս էր վառել «Հրազդան» մարզադաշտի ամբողջականությունը խախտելու և այնտեղ տեղի ունեցող միջոցառումներին ներկա գտնվողների կյանքը լրջորեն վտանգելու անհեռատես նախաձեռնության առաջ: Իսկ այդ ձեռնարկը հղի է մեծ վտանգներով, ինչպիսին վերջերս տեղի ունեցավ Եգիպտոսի մարզադաշտում բռնկված անկարգությունների հետևանքով, և հանդիսատեսին անվտանգ տարհանելու համապատասխան տարածքների բացակայության պատճառով բազմաթիվ մարդկային զոհեր եղան: