Ֆրանսիայի հավաքականի նախկին ֆուտբոլիստ, ՈՒԵՖԱ-ի նախագահ Միշել Պլատինին հայտարարել է, որ արգենտինացի Լիոնել Մեսին անընդմեջ շահած «Ոսկե գնդակների» քանակով անպայման կգերազանցի իր ռեկորդը:Պլատինին ֆուտբոլի պատմության մեջ միակ ֆուտբոլիստն է, ում երեք տարի անընդմեջ հաջողվել է «Ոսկե գնդակ» շահել (1983-1985 թթ., երբ խաղում էր Յուվենտուսում): Մեսին խաղալով «Բարսելոնայում»՝ այդ մրցանակն ստացավ 2009 և 2010 թթ.: Պլատինիի խոսքերով` Մեսին իր նկատմամբ առավելություն ունի, քանի որ «Բարսելոնայի» կազմում խաղում է 13 տարեկանից: Ինքը` ֆրանսիացին, «Յուվենտուս» է տեղափոխվել 27 տարեկանում, հաղորդում է leta.ru-ն:
Պլատինիից բացի՝ «Ոսկե գնդակի» եռակի հաղթող են դարձել հոլանդացի Յոհան Քրոյֆն ու Մարկո վան Բաստենը: Սակայն նրանց չհաջողվեց մրցանակակիր դառնալ երեք տարի անընդմեջ: Ինչ վերաբերում է Մեսիին, ապա նա ներառվել է այն 23 խաղացողների ցուցակում, որոնք հավակնում են 2011 թ. «Ոսկե գնդակին» և այդ մրցանակի համար պայքարում ամենահավանական թեկնածուն է համարվում:
