Կարծում է ՀՀ Մարդու իրավունքների պաշտպան Կարեն ԱՆԴՐԵԱՍՅԱՆԸ
Վերջերս «Ազատություն» ռադիոկայանի եթերում ՀՀ արդարադատության նախարար Հրայր Թովմասյանն անդրադարձավ Մարդու իրավունքների պաշտպանի` իրենց գերատեսչության վերաբերյալ զեկույցին: Հիշեցնենք, որ Մարդու իրավունքների պաշտպանի գրասենյակը մոտ մեկ ամիս առաջ հրապարակել էր Արդարադատության նախարարությունում իրականացված ուսումնասիրությունների արդյունքների հիման վրա կազմված զեկույցը, որտեղ նշված էին ԱՆ գործունեության ոլորտում առկա թերություններն ու խնդիրները:
ՄԻՊ Կարեն Անդրեասյանը դիմել էր ՀՀ արդարադատության նախարար Հրայր Թովմասյանին` երեք դատավորների գործերով կարգապահական վարույթ հարուցելու հաղորդմամբ (երեք քաղաքացիներ դիմել էին Մարդու իրավունքների պաշտպանին` համոզված, որ դատավորներն իրենց հանդեպ անարդար են գործել): Սակայն նախարարը նրանց դիմումները մերժել էր` նույնիսկ առանց գործերը քննելու: Ֆեյսբուքյան ասուլիսի ժամանակ նախարարը հայտարարել էր, որ եթե իր և Կ. Անդրեասյանի կարծիքները չեն համընկնում, դա չի նշանակում, թե ՄԻՊ-ը ճիշտ է: Կ. ԱՆԴՐԵԱՍՅԱՆԻն խնդրեցինք մեկնաբանել նախարարի` իր զեկույցի վերաբերյալ արձագանքը:
- Պարոն Անդրեասյան, արդարադատության նախարարն ի պատասխան այն հարցի, թե ինչու են օրինախախտ դատավորները մնում անպատիժ, նշեց, թե դատավորներին պատժելը չպետք է ինքնանպատակ լինի, պատիժը պետք է լինի միայն ակնհայտ և կոպիտ խախտումների պարագայում: Ինչպե՞ս կմեկնաբանեք:
- Ես նախարարին դիմել էի երեք դատավորների գործերով կարգապահական վարույթ հարուցելու հաղորդմամբ: Եթե արդարադատության նախարարը դրանցից միայն երկուսում խախտում տեսավ, այն էլ իր կարծիքով ոչ կոպիտ, իսկ մյուսում ընդհանրապես խախտում չտեսավ, նշանակում է` նա գոնե երկու դատավորի գործով ինձ հետ համաձայն է` խախտումը կա: Իսկ այդ խախտումը կոպիտ է, թե ոչ` արդարադատության նախարարը չպետք է որոշի: Նա պետք է դա փոխանցի արդարադատության խորհրդին, որն էլ կորոշի խախտման կոպիտ կամ ոչ կոպիտ լինելը: Ես չեմ հակադրվում պարոն Թովմասյանին, պարզապես ընդգծում եմ, որ նա իրեն թույլ է տվել գնահատել խախտումը, իսկ ես ինձ թույլ չեմ տալիս: Կխնդրեի, որ նա էլ նույն կերպ վարվեր և գործերը Արդարադատության խորհրդին փոխանցեր:
- Ըստ ձեզ` ինչո՞ւ դա չարվեց:
- Քանի որ պարոն նախարարը կարծում է, թե ինքն իրավասություն ունի գնահատելու` ոչ միայն եղել է խախտում, այլև այդ խախտումը կոպի՞տ է, թե ոչ: Այսինքն նա գերազանցում է իր իրավասությունները:
- Նույն ասուլիսի ժամանակ նախարարը նաև նշել էր, թե ձեր շոշափած հարցերի պատճառով (հարկային կոմիտեին ներկայացվող գրությունները պատշաճ չեն վերլուծվել, ինչո՞ւ են նոտարական տարբեր գրասենյակներ նույն ծառայությունների համար տարբեր սակագներ սահմանում) զեկույցն արժեզրկվում է, ուստի ձեզ հորդորեց զգույշ լինել գնահատականներում:
- Ես բոլոր գերատեսչություններից ստանում եմ տարբեր արձագանքներ, ընդ որում մեծամասամբ շատ դրական: Ես չեմ մեկնաբանի պարոն Թովմասյանի գնահատականը, կսպասեմ իր պաշտոնական պատասխանին և հետո միանգամից կարձագանքեմ: Բայց հավաստիացնում եմ, որ զեկույցը և մասնագիտական, և օբյեկտիվության, և մյուս բոլոր չափանիշներով պետական, հասարակական, քաղաքական կառույցների կողմից ստացել է դրական գնահատականներ: Այն, որ պարոն Թովմասյանն այդպիսի ընդհանուր մտահոգություն ունի` շնորհակալ եմ, բայց դարձյալ իր հետ համաձայն չեմ:
- Ի՞նչ կարծիքի եք նախարարի այն դիտարկման մասին, թե Մարդու իրավունքների պաշտպանի ինստիտուտը կայացման փուլում է:
- Ես կարծում եմ` մեր հանրապետությունում դատաիրավական ամբողջ համակարգը, պետությունը, այդ թվում` արդարադատության նախարարությունը կայացման փուլում են: Թե որ ինստիտուտն է ավելի կայացած` կարող ենք քննարկել` հաշվի առնելով, որ մեր ինստիտուտը 7 տարեկան է, արդարադատություն նախարարությունը` 20: Եթե մենք կայացվածության նույն մակարդակին ենք, արդեն մեզ համար շատ լավ է: Կարծում եմ, որ եթե նախարարն ավելի բովանդակային արձագանքի մեր զեկույցին, արդարադատության նախարարության ինստիտուտն ավելի շուտ կկայանա: Մենք սպասում ենք դրան:
