Թեյը վնասակար դարձնելու10 ստույգ միջոց
Թեյը կարող է ոչ միայն օգտակար, այլև վնասակար լինել... Ահավասիկ՝ տասն արգելք
Առաջին
Քաղցած ժամանակ թեյ չխմել: Չինաստանում դա շատ վաղուց էին խորհուրդ տալիս:
Երկրորդ
Չխմել եռման թեյ: Չափազանց տաք թեյն ահավոր գրգռում է կոկորդը, կերակրափողն ու ստամոքսը: Իսկ եթե միշտ եք թեյը եռման վիճակում խմում, կարող եք այդ օրգանների զանազան հիվանդություններ հրահրել: Արտասահմանյան հետազոտությունները վկայում են, որ եթե հաճախակի խմեք 62 աստիճանից տաք թեյ՝ ձեր ստամոքսի պատերը կդառնան շատ խոցելի, և ի հայտ կգան տարբեր հիվանդությունների ախտանշաններ: Թեյը չպետք է 56 աստիճանից տաք լինի:
Երրորդ
Չխմել սառը թեյ: Եթե տաք կամ եռման թեյը թարմացնում է, լավացնում գիտակցությունն ու տեսողությունը` ապա սառը թեյն ունենում է մի շարք կողմնակի ազդեցություններ՝ սառեցնում է կոկորդը և խորխի կուտակման պատճառ դառնում:
Չորրորդ
Չխմել չափազանց թունդ թեյ. նրանում պարունակվող կոֆեինն ու տանինը կարող են գլխացավի ու անքնության պատճառ դառնալ:
Հինգերորդ
Երկար չթրմել, քանի որ պոլիֆենոլներն ու եթերային յուղերը սկսում են օքսիդանալ, ինչը ոչ միայն թեյը զրկում է թափանցիկությունից, համային որակներից ու բույրից, այլև զգալիորեն նվազեցնում նրա սննդարար արժեքը` թեյի տերևներում պարունակվող վիտամին C-ի ու P-ի, ամինաթթուների և այլ արժեքավոր նյութերի օքսիդացման հաշվին: Բացի դրանից՝ թրմվելու ընթացքում թեյը ենթարկվում է շրջակա միջավայրի ազդեցությանը և սկսում է ավելի շատ մանրէներ ու սնկեր կուտակել:
Վեցերորդ
Թեյը մի քանի անգամ չթրմել: Սովորաբար երրորդ և չորրորդ անգամ թրմվելուց հետո նրա տերևներում շատ քիչ բան է մնում: Փորձերը ցույց են տալիս, որ առաջին անգամ թրմվելիս թեյի տերևներից քամվում է օգտակար նյութերի մոտավորապես 50 տոկոսը, երկրորդ անգամ՝ 30 տոկոսը, երրորդ անգամ՝ ընդամենը 10 տոկոսը, իսկ չորրորդ անգամ թրմելով՝ կավելացնեք ընդամենը 1-3 տոկոս: Իսկ եթե թեյը շարունակեք էլի թրմել՝ կարող են հայտնվել նաև վնասակար բաղադրիչներ, քանի որ դրանք քիչ են և ամենաուշն են ի հայտ գալիս:
Յոթերորդ
Թեյը չխմել անմիջապես ուտելուց առաջ: Դրանով թուքն ավելի մածուցիկ եք դարձնում, սնունդն սկսում է անհամ թվալ, բացի դրանից՝ կարող է ժամանակավորապես նվազել մարսողական օրգանների կողմից պրոտեինի յուրացումը: Հետևաբար թեյը խմեք ուտելուց 20-30 րոպե առաջ:
Ութերորդ
Ուտելուց անմիջապես հետո թեյ չխմել: Ցանկացած առատ հեղուկ, եթե այն խմում եք ուտելուց անմիջապես հետո, դառնում է ստամոքսահյութի խտության նվազման պատճառ, ինչն իր հերթին դանդաղեցնում է մարսողությունը ու խախտում մարսողական բոլոր օրգանների աշխատանքը: Թեյն ավելի լավ է խմել ուտելուց 20-30 առաջ:
Իններորդ
Դեղերը թեյով չխմել: Թեյի մեջ պարունակվող փայտանյութերը քայքայվելիս առաջացնում են տանին, որի պատճառով շատ դեղեր նստվածք են տալիս և վատ են յուրացվում: Այդ պատճառով էլ չինացիները ասում են, որ թեյը քայքայում է դեղերը:
Տասներորդ
Չխմել երեկվա թեյը: Մեկ օր առաջ թրմված թեյը ոչ միայն կորցնում է վիտամինները, այլև դառնում է հարմար ու սննդարար միջավայր՝ մանրէների համար: Եթե թեյը չի փչացել, այն կարելի է բուժական նպատակներով օգտագործել, բայց միայն որպես արտաքին միջոց: Այսպես` մեկ օր առաջ թրմված թեյը հարուստ է թթուներով ու ֆտորով, որոնք կասեցնում են մազանոթների արյունահոսությունը, հին թեյը օգնում է նաև բերանի խոռոչի բորբոքումների, լեզվի ցավերի, էկզեմայի, արյունահոսող լնդերի, մաշկի մակերեսային վնասվածքների, թարախային գոյացությունների դեպքում: Աչքերի լվացումը երեկվա թեյով՝ օգնում է քչացնել տհաճ զգացողությունները, իսկ առավոտյան ատամները մաքրելուց առաջ կամ ուտելուց հետո բերանը թեյով ողողելը ոչ միայն թարմ շնչառություն է ապահովում, այլև ամրացնում է ատամները: 
Ինչպես տարբերել՝ մեղրն իսկակա՞ն է, թե կեղծ
Մեղրի օգտակար հատկությունները վաղուց հայտնի են: Բայց հիմա շատ դժվար է իսկական մեղրը զանազանելը, իսկ կեղծ մեղրից ոչ մի օգուտ չկա:
Ինչպես ստուգել մեղրի որակը
Հեղուկ (չշաքարակալած, թարմ) մեղրի հասունությունը որոշելու համար դրա մեջ մտցրեք գդալը և սկսեք պտտել: Ոչ հասուն մեղրը գդալից ծորում է, իսկ հասունը՝ հնարավոր է լինում փաթաթել գդալի վրա՝ այն ժապավենի նման փաթաթվում է գդալին:
Փորձեք հեղուկ (չշաքարակալած) մեղրը` ամանի մեջ մտցնելով բարակ փայտիկ: Եթե մեղրն իսկական է, ապա այն փայտիկի հետևից ձգվում է երկար անընդմեջ թելիկով, իսկ երբ այդ թելը կտրվում է, փայտիկն ամբողջովին ընկղմվում է մեղրի մեջ` մակերեսին առաջացնելով փոսիկ, որը հետո դանդաղորեն ցրվում է: Իսկ կեղծ մեղրը սոսնձի հատկանիշներ է ունենում` հոսում է ու փայտիկից կաթկթում՝ առաջացնելով շիթեր:
Որակյալ մեղրը չպետք է փրփրի: Փրփուրը վկայում է խմորման, այսինքն մեղրի փչացած լինելու մասին: Բնական մեղրը չի կարող խմորվել, քանի որ ունի մանրէասպան հատկություն:
Ժամանակի ընթացքում մեղրը պղտորվում է և խտանում (շաքարակալում)` դա լավ որակի նշան է: Մեղրը որպես կանոն հեղուկ վիճակում է լինում ամռանը (հուլիս- օգոստոս ամիսներին), երբ նոր են փեթակներից հանում: Առավելագույնը 1-2 ամսից (նայած, թե ինչ տեսակի մեղր է) այն բյուրեղանում է: Այդ պատճառով էլ եթե ձմռանը կամ գարնանը հեղուկ մեղր է վաճառվում, ուրեմն այն կամ տաքացած է, կամ կեղծ: Հարկ է հիշել, որ մինչև 40 աստիճան ու ավելի տաքացնելիս մեղրը կորցնում է հիմնական օգտակար հատկությունները: Շաքարակալած մեղրում պահպանվում են բոլոր բնական օգտակար հատկությունները, ու ցանկալի չէ այն տաքացնել կամ ավելացնել տաք կերակրատեսակներին և ըմպելիքներին:
Իսկական մեղրը հիմնականում շաքարակալում է փեթակից հանելուց երկու-երեք շաբաթ հետո: Հաշվի առնելով, որ վերջին անգամ մեղրը սեպտեմբերի վերջին, հոկտեմբերի սկզբին են հավաքում` հոկտեմբերի 20-ից հետո բնական մեղրը կարող է լինել միայն շաքարակալած վիճակում: Բացառություն է սպիտակ ակացիաներից ստացված մեղրը, որը երկար ժամանակ` ընդհուպ մինչև գարուն չի բյուրեղանում: Երբեմն մեղրի ներքևի մասում բյուրեղացած շերտ է առաջանում, իսկ վերևում՝ օշարականման: Դա վկայում է այն մասին, որ մեղրը հասուն չէ և մեծ քանակությամբ ջուր է պարունակում:
Ստուգեք համն ու հոտը: Կեղծ մեղրը, որպես կանոն, հոտ չունի: Իսկական մեղրը տարբերվում է լավ բույրով: Այդ բույրը ոչ մի բանի հետ համեմատել հնարավոր չէ: Շաքարի խառնուրդով մեղրը համով նման է շաքարաջրին:
Որոշեք՝ մեղրում օսլա կա՞, թե ոչ: Դրա համար բաժակի մեջ մի քիչ մեղր լցրեք, վրան եռման՝ ջուր, խառնեք ու սառեցրեք: Դրանից հետո վրան լցրեք մի քանի կաթիլ յոդ: Եթե մեղրը կապտում է` ուրեմն դրանում օսլա կա:
Եվս մեկ՝ շատ պարզ և արագ ստուգում. անհրաժեշտ է մեղրը կաթեցնել թղթի վրա ու այրել: Թուղթը կայրվի, իսկ իսկական որակյալ մեղրը չի այրվի, չի հալչի և գույնը չի փոխի: Եթե մեղրը սկսել է հալվել` ուրեմն մեղուներին կերակրել են շաքարի օշարակով, իսկ եթե դարձել է շագանակագույն՝ ուրեմն այն լուծված է շաքարով: 
Օգտակար սննդի չարաշահումը ևս վնասակար է
Հետազոտողների գնահատականներով կանաչ ծաղկակաղամբի, ոսպի ու հապալասի նման օգտակար սննդի առատ գործածումը կարող է վտանգավոր լինել: Գիտնականները հայտնաբերել են, որ այդ մթերքները կարող են խախտել մկանների վնասվածքն ու սրտանոթային հիվանդությունների և քաղցկեղի հավանականությունը դանդաղեցնող հակաօքսիդանտների ու պրոօքսիդանտների հավասարակշռությունը:
ԱՄՆ-ի Կանզաս նահանգի համալսարանի սրտանոթային ու շնչառական վարժությունների լաբորատորիայի հետազոտողները քննարկել են, թե ինչպես է հնարավոր վարժությունների ժամանակ հակաօքսիդանտների միջոցով լավացնել մկանների թթվածնային մատակարարումը: Նրանք եզրակացրել են, որ երբեմն հակաօքսիդանտները կարող են խախտել մկանների գործունեությունը և ավելացնել հոգնածությունը, այսինքն ավելի շատ խոչընդոտել, քան օգնել: Հետազոտությունների համար կենդանիներին հակաօքսիդանտների տարբեր չափաբաժիններ էին ներարկում: «Այն կենդանիները, որոնց չափազանց շատ հակաօքսիդանտներ էին ներարկել` մկանային գործառույթների խանգարումներ էին ձեռք բերել»,- հայտնում է հետազոտությունը, որը հրապարակվել է Joural of Applied Physiology ամսագրում:
Պրոֆեսոր Դևիդ Ս. Փուլը, ով մասնակցել էր փորձերին, ասել է. «Երբ մենք աշխատում ենք սրտի նոպայից նոր ապաքինվող մարդկանց հետ` նրանք բողոքում են, որ վարժություններ անելիս ու վազելիս դժվարություններ են զգում: Նրանց մկանները ցավում են ու կաշկանդվում: Մենք փորձում ենք հասկանալ, թե արյան բջիջներն ինչու չեն թթվածին փոխադրում դեպի մկաններ, ինչպես արվում է առողջ մարդկանց օրգանիզմում»:
Լաբորատորիայի գիտաշխատող Սթիվեն Կոպը հավելել է. «Հակաօքսիդանտներ բառը վերջին ժամանակներս դարձել է շատ ժամանակակից: Իմ կարծիքով շատերը պարզապես չեն հասկանում, որ պրոօքսիդանտների ու հակաօքսիդանտների հավասարակշռությունը շատ նուրբ հարց է: Մեր հետազոտությունը ցույց է տալիս, որ չի կարելի պարզապես հակաօքսիդանտների մեծ չափաբաժին տալ` ապավինելով դրանց դրական ազդեցությանը: Պետք է նկատի ունենալ, որ դրանք կարող են նաև ամեն ինչ վատացնել»: Պրոֆեսոր Փուլի խոսքերով՝ մարդիկ հակաօքսիդանտների մասին լսելիս մտածում են առողջության վրա դրանց բարերար ազդեցության մասին, բայց հետազոտությունները ցույց են տալիս, որ հակաօքսիդանտները փաստորեն կարող են նաև ճնշել ազդանշանային հիմնական մեխանիզմները, որոնք անհրաժեշտ են մկանների գործունեության համար: «Պետք է ընդունել ի գիտություն, որ մինչ մարդկանց մեծ քանակությամբ հակաօքսիդանտներ խորհուրդ տալը մենք պետք է ավելի լավ հասկանանք ֆիզիոլոգիական համակարգում` մասնավորապես ֆիզիկական ծանրաբեռնվածության ժամանակ դրանց գործառույթը ու վարքագիծը»,- ասում է Փուլը:
