Իտալացի հեղինակ Ռոբերտո Սավիանին` Իտալիայի կազմակերպված հանցագործության մասին բեսթսելերի հեղինակը, համարձակ գրելու համար արժանացել է Հարոլդ Փինթերի անվան բրիտանական մրցանակին: 2006 թ. տպագրված նրա «Գոմորա» գիրքը պատմում է Նեապոլի մաֆիայի ցանցի մասին: «Գոմորան» գրված է լրագրողական հետախուզության ժանրով և պատմում է «կամորա» նեապոլիտանական մաֆիայի ձեռնարկատիրական գործունեության, ինչպես նաև Սկամպիա խեղաթյուրված նեապոլիտանական թաղամասի կլանների վերջին մաֆիոզ պատերազմի գաղտնի դրդապատճառների մասին: Գիրքը լույս տեսնելուն պես գլխավորեց բեսթսելերների ազգային ցանկը:
Լրագրողը ոչ միայն մանրամասնորեն ներկայացրել է «Համակարգի» («կամորան» այդպես են անվանում մաֆիայի շարքային անդամները) գործունեության գաղտնի կողմերը, նրա ֆինանսատնտեսական և մարտական ուժը, խոշոր հոլդինգի աստիճանական վերափոխումը, այլև նշել է մաֆիոզ կլանների այնպիսի գործող ղեկավարների անուններ, ինչպիսիք են Միքելե Զագարիան, Անտոնիո Յովինեն և նրանցից թերևս ամենատխրահռչակը` Սանդոկան մականունով Ֆրանչեսկո Սկյավոնեն: Հեղինակի խոստովանությամբ գրելու շարժառիթ դարձել է սարսափելի վիճակագրությունը. «Ծննդյանս օրվանից սկսած՝ Նեապոլ մայրաքաղաքով Կամպանիա մարզում «կամորայի» զոհ է դարձել 3 500 մարդ, դա ավելի է, քան սպանել են սիցիլիական մաֆիան, «Նդրանգետա» կալաբրիական մաֆիան, ալբանական մաֆիոզ կլանները կամ ռուսական կազմակերպված հանցագործ խմբերը»:
Ինչպես հաղորդում է Բի Բի Սին` մաֆիայի մշտական սպառնալիքները ստիպել են երկրի իշխանություններին Սավիանոյին շուրջօրյա պաշտպանության տակ առնելու որոշում կայացնել:
Սկզբում լրագրողի բջջային հեռախոսով զանգել և բազմանշանակ լռել են, այնուհետև սպառնալիքներով նամակներ են ուղարկել և վերջապես Նեապոլում` լրագրողի հայրենիքում նրա շուրջն «օտարացման գոտի» է ձևավորվել, անգամ հացավաճառը, ումից Սավիանոն երկար տարիներ հաց է գնել, ասել է. «Ի՞նչ կլինի՝ ուրիշ տեղից հաց գնեք»:
Ռոբերտո Սավիանոյին թիկնապահներ հատկացրին միայն այն ժամանակ, երբ գրող Ումբերտո Էկոն առաջին ազգային հեռուստաալիքի ուղիղ եթերով դիմեց իշխանություններին` կոչ անելով պաշտպանել նրան: Անտարբեր չմնաց նաև հասարակությունը` ստեղծելով «Ես Սավիանոյի կողմից եմ» բլոգը:
