Հունվարի վերջին օրը Երևանում Top Table/Cluboratoria սրճարանում տեղի ունեցավ «Պուտին» ակումբի` փետրվարի 2-ին ծրագրվող պաշտոնական բացման արարողության ծաղրանմանակումը: «Վլադիմիր Պուտին համազգային երիտասարդական շարժման վարչություն»` այսպես են իրենց անվանել ակցիայի նախաձեռնողները, ովքեր այս առիթով «Պուտինկա» օղիով լի բաժակներ են բարձրացրել և խոստացել Պուտինի մեծարման միամսյակներ կազմակերպել:
 ԱՊՀ երկրների Երիտասարդական միության կառավարման խորհրդի նախագահ Անդրանիկ Նիկողոսյանը նյարդային ձևով արձագանքեց անսպասելի մրցակիցների մասին նորությանը և հունվարի 30-ին նույնիսկ հանդես եկավ հայտարարությամբ. «Իմ խոր վրդովմունքն եմ արտահայտում հայկական լրատվամիջոցներ ներթափանցած նորությունների կապակցությամբ առ այն, որ հունվարի 31-ին Երևանում բացվում է «Պուտին» ակումբը: Ավաղ, նախանձն ու անազնիվ մրցակցությունն անհասկանալի մարդկանց ու կազմակերպությունների մի խմբի դրեցին ԱՊՀ երիտասարդական միությունից գողանալ ակումբի ստեղծման մտահղացումը: Պուտինի իսկական ակումբը կբացվի փետրվարի 2-ին՝ Ռուսական գրքի տանը»:
 Ի դեպ հունվարի 30-ին «Արևելք-արևմուտք» ռուսական ինտերնացիոնալ բարեկամության միության նախագահ Ռասիմ Դանդարովը մամուլի ասուլիս հրավիրեց և հայտարարեց, որ հիմնադիրների անունից որպես բողոքի նշան հետ է կանչում իր ստորագրությունը ԱՊՀ երիտասարդական միության ստեղծման մասին փաստաթղթերից՝ Հայաստանում Ռուսաստանի նախագահի թեկնածու Վ. Վ. Պուտինի անվան շահարկման կապակցությամբ: Նա նշել է. «Մեր միջազգային միությունում վաղուց են տագնապալի հարցեր առաջացել ԱՊՀ սահմաններում պարոն Նիկողոսյանի գործունեության մասին, որը չգիտես ինչու՝ գովազդվում էր միայն Հայաստանում ու Արարատ քաղաք և ոչ թե ԱՊՀ բոլոր տարածքներում: Առանց Պուտինի նախընտրական շտաբի համաձայնության՝ Վ. Վ. Պուտինի անվան գովազդային ակումբների ստեղծումը մենք համարում ենք «սև փիառ»՝ ի շահ արևմտյան որոշ շրջանակների: Այդ կապակցությամբ մենք կոչ ենք անում Երիտասարդական միության մյուս հիմնադիրներին Պուտինի ակումբների իսկական ցանց ստեղծել և այդ նպատակով արդեն մի շարք վարձակալված շենքեր ենք առաջարկում Ռուսաստանի, Բելառուսի և Ադրբեջանի հանրապետության տարածքում»: