«Հայաստանի զրուցակցի» նախորդ համարում մենք արդեն գրել էինք «Պուտին» ակումբների մասին, որոնց ցանցը մտադիր է Հայաստանով մեկ տարածել մեր նախաձեռնող հայրենակիցներից մեկը` Անդրանիկ Նիկողոսյանը: Վերոհիշյալ ակումբների անդամները, նախաձեռնողների խոսքերով, հնարավորություն կունենան օգտվել գրականությունից և վավերագրական ֆիլմեր դիտել Պուտինի մասին, քննարկել նրա գաղափարներն ու ծրագրերը: Մնում է միայն շնորհակալություն հայտնել Աստծուն, որ Նիկողոսյանն ու նրա համախոհները հավանաբար դեռ տեղյակ չեն, որ Ռուսաստանում արդեն մի քանի տարի է՝ գործում է Վլադիմիր Պուտինի հետևորդների կրոնական աղանդը:
Վլադիմիր Պուտինի հետևորդների աղանդի մասին, որը Ռուսաստանում հայտնի է «Պուտինը՝ Քրիստոսի առաքյալ» անունով և գործում է Նիժնի Նովգորոդի մոտակայքում` Բոլշայա Ելնյա գյուղում, մոսկովյան «Սոբեսեդնիկը» գրել էր անցած տարի: Աղանդի հիմնադիրը մատուշկա Ֆոտինյան է, ով ՎՎՊ-ին համեմատում է Քրիստոսի առաքյալի հետ: Մասնավորապես` Պողոս առաքյալի: Մատուշկա Ֆոտինյան վստահ է, որ ՎՎՊ-ի և Պողոս առաքյալի կյանքերը շատ նման են: Վարչապետը, լինելով
ԽՍՀՄ-ի հատուկ ծառայությունների աշխատակից, կրոնապաշտ չի եղել: Սակայն իշխանության գալուց հետո նրա վրա իջել է Սուրբ հոգին, որը թույլ է տալիս Վ. Վ. Պուտինին իմաստուն կերպով ղեկավարել իր հոտին...Ի դեպ մատուշկա Ֆոտինյան վստահ է, որ ինքն իր նախկին կյանքերից մեկում իշխանուհի Օլգան է եղել: Իրավապահ մարմիններն ստուգելով մատուշկայի անձը՝ այդքան հեռուները տեսնել չեն կարողացել, փոխարենը հաստատել են, որ 90-ականներին մատուշկա Ֆոտինյան նույն ինքը՝ անձնագրով Սվետլանա Ֆրոլովան, աշխատել էր Գորկու երկաթգծի պահեստում և մեկուկես տարի բանտ է նստել խաբեբայության համար: Ոչ այնքան հեռավոր վայրերից վերադառնալուն պես Սվետլանա Ռոբերտովնան անսպասելի զգացել է, որ ինքը «Քրիստոսի քույրն է», ու «Աստծո մարմնավորումը՝ երկրի վրա»: Դրանից հետո նա առանց երկար-բարակ մտածելու տուն է գնել Նիժնի Նովգորոդի մոտակայքում, բացել եկեղեցի, ինքն իրեն ձեռնադրել հոգևորական և կատարել զանազան ծիսակարգեր: Բնականաբար ոչ անվճար: Հետևորդներին գրավելու համար աշխարհի բոլոր կրոնները նա միավորել է մեկ «տիեզերական» կրոնի մեջ:
Աղանդի հետևորդներն ունեն նաև իրենց սրբությունները: Դրանցից ամենակարևորն Աստվածամայրն է: Կա նաև Վ. Վ. Պուտինի դիմանկարով սրբապատկեր: Մատուշկան քարոզում է, իսկ հետևորդները լսում նրան: Իսկ հետո շրջան են կազմում և իրենց էներգիան ուղղում դեպի Ռուսաստանի մաքրագործումն ու բարգավաճումը: Մատուշկա Ֆոտինյայի ազատամտությունը պարզապես ապշեցնում է: Օրինակ նրա եկեղեցում սաղմոսների փոխարեն միշտ հնչում է «Թող լինի միշտ արևը» երգը, իսկ նրա հետևորդներն աղոթում են գորգիկների վրա չոքած: Մատուշկան գլուխ է գովում Վ. Վ. Պուտինի հետ իր նամակագրությամբ և պատրիարք Կիրիլի օրհնանքով:
Մինչդեռ Պուտինի մամուլի քարտուղար Դ. Պեսկովը «Սոբեսեդնիկին» տված հարցազրույցում հայտարարել է, որ առաջին անգամ է լսում այդ աղանդի
մասին, չնայած վերջինս ստեղծվել է 2005 թ.: Ի տարբերություն կրեմլյան պաշտոնյաների՝ տեղական իշխանությունները գիտեն աղանդի գոյության մասին, բայց ոչինչ չեն կարող ձեռնարկել, քանի որ դրա ապօրինի գործունեության մասին տեղեկություններ չունեն: Այս տարի աղանդում նախընտրական հրաշք տեղի ունեցավ: Նախագահի թեկնածու և ներկա վարչապետ Վլադիմիր Պուտինի սրբապատկերից, ինչպես նաև նրա օրհնված դիմանկարից 2012 թ. հունվարի 19-ին սկսեց մեռոն ծորել: Առաջադեմ մատուշկան իր պաշտոնական կայքն ունի ինտերնետում, որտեղ էլ տեղեկացրել է այդ ուրախալի նորության մասին: Մատուշկա Ֆոտինյայի կարծիքով հրաշքը տեղի է ունեցել Պուտինի հանդեպ ժողովրդի տածած խոր հավատի շնորհիվ: «Պուտինը Ռուսաստանի այլ ճանապարհն է»: Հիմա Ֆոտինյան հայտարարում է, որ նախկին կյանքերից մեկում ինքը եղել է իշխան Վլադիմիրը, ով մկրտել է Ռուսիան: Եվ ըստ մատուշկայի` Վլադիմիր Պուտինը պետք է ևս մեկ անգամ Ռուսաստանը մկրտի:
Օրերս հայտնվեց ևս մեկ նորություն` Պուտինի սրբապատկերից այլևս մեռոն չի ծորում: Եվ Ֆոտինյան կերպարանափոխվեց՝ հիմա նա իրեն կոչում է Մարիա, դա նրա նոր ռեինկարնացիան է: Չենք զարմանա, եթե մինչև ընտրություններ նա հասցնի կրկին վերածնվել, այս անգամ արդեն՝ Աստվածամոր կերպարով:
Այնպես որ Հայաստանում բացված Պուտինի ակումբները ինչպես տեսնում եք` դեռ ծաղիկներն են: Կարող էր ավելի վատ լինել:
